Vico Equense - Faito, se rimane disgustate, v’assicuro, p’’a munnezza ca sta pe’ miez’’a via... (di Antonio Cavallaro)

Ve voglio fa nutà na cosa grave,
sto parlànno ‘e Faito, cari amici.
Guardate ‘e pperzone quante so’ bbrave:
faciteve nu giro a via Pendici.

Se rimane disgustate, v’assicuro,
p’’a munnezza ca sta pe’ miez’’a via,
è addeventato nu scarrecaturo
e mit’a credere, è na fetenzia.

Dich’io, po’ essere ca nisciuno ‘o vvede?
Comme se nc’è arrivate a chistu punto?
Nun voglio dì ca stanno in malafede,
però, pecché nun ne pigliano cunto?

‘A verità è ca nun ‘mporta a nisciuno,
comme si sta muntagna n’esistésse.
Faito, ormai è terra di nessuno.
Nun nce sta ammore, nun nce sta interesse!