di Antonio Cavallaro
Vico ormaie è addeventato
“un paese affittato”
mmiez’’e vvie, a ogne lato
truove nu cazebo aizàto.
Nun può passiggià ‘o ssicuro,
te ne a scénnere pe’ forza,
e si staie cu ‘o criaturo
chillu tratto lle a fa ‘e corza.
Cammenàve pe’ ore sane
senza ntuppe, fin’aiere,
mo, no cchiù: stanno ‘e ppedane
pure ncopp’’e marciappiere.
Si t’arape nu “pertuso”
‘e snack- bar, o pizzaiuolo?
No problem. Si’ ambiziuso?
‘O cumune affitta ‘o suolo.
A isso che lle ne fotte
basta ca se piglia ‘e sorde…..
E nuie ‘a fine d’’e bbotte
facimmo pe’ sti milorde.
Pure abbascio ‘o monumento,
si facènne ‘a passeggiata,
te vuo’ fermà nu mumento
sulo ‘o tiempo ‘e n’affacciata..
Non si può, pecché hano miso,
mbrielle, seggie e tavuline,
separé che nce hanno stiso…,
me se tòrcene ‘e stentine!
Nessun commento:
Posta un commento